Grasie a uno de i nòstri sponsor (gramarsè davero!) gavemo inparà na via nova de comunicar e gestir i afari. No ghe xé tanto da inparar in realtà, xé da réndarse conto de ƚa realtà de ƚa comunicasion, de come che xé stà distruta sia ƚa sociaƚità che ƚa conomìa real in manco de 20 ani, e de còsa che gavemo a dispoxision par tornar a èsar paroni de nialtri stesi. El Galepin el xé nato durante el perìodo de adosion universal de internet, in cui se podeva acéder a internet co' na telefonada urbana (che i fioi de ancùo no i sà gnanca còsa che voja dir) e far un account de email sensa prexentar documenti. Sociaƚità vera (cioè non sociaƚista) fra persone vere. Podòpo xé rivà i "social" de ƚe corporasion, che sucesivamente ƚe xé deventàe (grasie ai "regoƚatori" anemài da 'l pòpoƚo sovran) "big tech" e ƚa xente ƚa xé stada trasformada (par tràmite de ƚa so stesa atività) in ogèti amòrfi de propietà de i "regoƚatori" stesi. Ƚa vera società vèneta (co' ƚa so léngua e cultura) ƚa xé stada fagocitada, atomixada e polverixada, come tuto el rèsto de l'umanità sčiavixada da i "social", in partiti poƚédeghi, falsità istitusional e tuto el rèsto de 'l armamentario, come da promesa e premesa de ƚa revoƚusion in corso da 200 ani.

Ma ghe xé 'l antìdoto xà funsionante, privacy e sovranità vera. E semo oncora cuà. Basta liberarse de i "social" e de i canaƚi de ƚa finansa tradisional.